لورالائی میں دہشت گردی کا بڑا منصوبہ ناکام، 4 خودکش حملہ آور ہلاک

کوئٹہ:(26 مارچ 2019) بلوچستان کے ضلع لورالائی میں سیکیورٹی فورسز سے فائرنگ کے تبادلے پر خاتون سمیت چار خودکش بمباروں نے خود کو دھماکے سے اڑا لیا ہے۔تفصیلات کے مطابق لورالائی میں خفیہ اطلاع پر سیکیورٹی فورسز نے ناصرآباد میں مکان پر چھاپہ مارا، تو مکان میں موجود دہشت گردوں نے سیکیورٹی اہلکاروں پر فائرنگ کردی، جواب میں سیکیورٹی فورسز نے بھی فائرنگ کی۔جس کے نتیجے میں ایک دہشت گرد مارا گیا، سیکیورٹی فورسز کی بہترین حکمت عملی کے باعث خودکش بمباروں کو فرار ہونے کا راستہ نہ مل سکا تو خاتون سمیت تین خودکش بمباروں نے خود کو دھماکے سے اڑالیا۔اے ایس پی لورالائی کے مطابق فائرنگ کے تبادلے میں چار اہلکار زخمی بھی ہوئے جبکہ دھماکے سے ساتھ والے مکان کی دیوار گرنے سے مزید چار افراد زخمی بھی ہوئے

اسلام آباد ہائی کورٹ آج دو بہنوں کی درخواست پر سماعت کرے گا

اسلام آباد: (26 مارچ 2019) اسلام آباد ہائی کورٹ آج ہندو مذہب چھوڑ کر اسلام قبول کرنیوالی دو بہنوں کی درخواست کی سماعت کرے گا،گھوٹکی سے مبینہ اغوا کے بعد اسلام قبول کرنے والی لڑکیوں نے تحفظ کے لئے کل اسلام آباد ہائی کورٹ سے رجوع کیا تھا۔تفصیلات کے مطابق چیف جسٹس اسلام آباد ہائیکورٹ درخواست پر سماعت کریں گے،گذشتہ روز گھوٹکی سے مبینہ لاپتہ بہنوں اور ان کے شوہروں نے اسلام آباد ہائیکورٹ میں درخواست دائر کی ہے، جس میں موقف اپنایا گیا ہے کہ تئیس مارچ 2019 کو خان پور بار کے سامنے دونوں لڑکیوں نے اسلام قبول کرنے کا باقاعدہ اعتراف کیا،اسلام قبول کرنے کے بعد رینا کا نام نادیہ جبکہ روینا کا نام آسیہ رکھا گیا تھا۔درخواست میں موقف اپنایا گیا تھا کہ لڑکیوں نے اسلام زور زبردستی قبول نہیں کیا بلکہ وہ عرصہ دراز سے اسلامی تعلیمات سے متاثر تھیں، مگر جان سے مارے جانے کے خوف کے باعث دونوں لڑکیوں نے اسلام قبول کرنے کا اعلان نہیں کیا تھا۔درخواست میں وزارت داخلہ، وزیراعلی سندھ ،آئی جی پولیس پنجاب، سندھ اوراسلام آباد اور رمیش کمار کو فریق بنایاگیا تھا اور استدعا کی گئی تھی  کہ غلط پروپیگنڈے کے باعث دونوں بہنوں اور ان کے شوہروں کی جان کو خطرات ہیں،لہذا اسلام آباد ہائی کورٹ دونوں بہنوں کے تحفظ کے لیے اقدامات کرنے کا حکم دے۔واضح رہے کہ گذشتہ روز وزیراعظم، وزیرداخلہ برائے کے نوٹس لینے پر ڈھرکی سے مبینہ اغوا ہونے والی ہندو لڑکیوں کے کیس کا ڈراپ سین ہوا تھا، جہاں دونوں لڑکیوں نے مرضی سے اسلام قبول کرنے کے بعد نکاح کرلیا تھا۔اس سے قبل گذشتہ روز دونوں لڑکیوں نے تحفظ کیلئے بہاولپور کی عدالت سے رجوع کرتے ہوئے موقف اپنایا کہ ہمیں کسی نے اغوا نہیں کیا بلکہ ہم اپنی مرضی سے گھر سے نکلی تھیں اور اب ہم نے اسلام قبول کیا ہے۔واضح رہے کہ چند روز قبل ڈہرکی کے نواحی گاؤں حافظ سلیمان کے رہائشی ہری لعل مینگھواڑ کی دو بیٹیاں روینا اور رینا نے گھر سے فرار ہوگئی تھیں جبکہ لڑکیوں کے والد نے دونوں کو مبینہ طور پر اغوا کرنے کا الزام عائد کیا تھا

بلاول بھٹو کی زیر قیادت حکومت مخالف ٹرین مارچ کا آج سے شروع ہوگا

کراچی:(26 مارچ 2019) حکومت کو ٹف ٹائم دینے کے پہلے مرحلے میں بلاول بھٹو کی زیر قیادت ٹرین مارچ آج کراچی سے لاڑکانہ روانہ ہوگا، چیئرمین پیپلز پارٹی 20 ریلوے اسٹیشنز پر خطاب کرینگے۔پیپلز پارٹی کا ٹرین مارچ آج صبح نو بجے بکروں کے صدقے کے بعد کینٹ اسٹیشن سے روانہ ہو گا۔بلاول بھٹو زرداری کوٹری، حیدرآباد، نوابشاہ اور سکھر میں کارکنان کا لہو گرمائیں گے، پی پی پی ٹرین مارچ ستائیس مارچ کو لاڑکانہ پہنچ کر اختتام پذیر ہوگا۔گذشتہ روز وزیراعلیٰ سندھ نے کینٹ اسٹیشن پر پیپلز پارٹی کے کیمپ کا دورہ کیا، جہاں انہوں نے شکوہ کیا تھا کہ محکمہ ریلوے نے ٹرین مارچ کے انتظامات اچھے نہیں کیے، مگر اس کے باوجود ہم پیپلزپارٹی کے ورکرز چیئرمین کا بھر پور استقبال کریں گے۔وزیر اعلیٰ سندھ نے کہا کہ وفاقی حکومت عوام کو مزید مشکل میں ڈال رہی ہے۔ ہم نے ٹرین کے پیسے بھرے ہیں لیکن سہولت نہیں دی گئی۔ جب اسلام آباد میں ہی حاضری دینا ہے تو سندھ نیب کو بند کر دینا چاہیے۔وزیر بلدیات سندھ سعید غنی نے کہا کہ موجودہ وفاقی حکومت سے کوئی بعید نہیں لیکن اگر کاروان بھٹو ٹرین مارچ میں کسی قسم کی خلل ڈالی گئی تو ہم ٹرین کو دھکا لگا کر بھی مارچ شروع کر دیں گے۔