سانحہ اے اپی ایس کے معصوم شہدا کو عمران خان کا خراج تحسین

اسلام آباد: (16 دسمبر 2018) سانحہ اے پی ایس کی چوتھی برسی کے موقع پر وزیراعظم عمران خان نے غمزدہ والدین سے دلی ہمدردی کا اظہار کرتے ہوئے کہا کہ وہ والدین جنہوں نے اپنے لخت جگر تعلیم کے حصول کے لیے بھیجے مگر وہ شہادت کی قبا اوڑھے گھروں کو لوٹے۔ پوری قوم معصوم شہداء کے ان والدین کے دکھ میں برابر کی شریک ہے۔سانحہ اے پی ایس کے موقع پر اپنے پیغام میں وزیر اعظم عمران خان کا کہنا ہے کہ سانحہ اے پی ایس پشاور میں بچھڑ جانے والوں کی یاد ہمیشہ موجود رہے گی۔ سولہ دسمبر کو معصوم طلبا کی شہادت کے اس دلخراش واقعے نے جہاں پوری قوم کو کرب و غم میں مبتلا کیا وہیں قوم میں دہشت گردی کے خلاف یکجہتی اور وحدت کو جنم دیا۔ فوج اور دیگر قانون نافذ کرنے والے اداروں نے آپریشن ضرب ِعضب اور ردالفساد کے ذریعے دہشت گردی کے خلاف وہ فیصلہ کن معرکہ سر انجام دیا جس کی مثال نہیں ملتی۔عران خان نے کہا کہ پاکستانی قوم نے دہشت گردی کے خلاف جنگ میں وہ قیمت ادا کی جس کا کوئی تخمینہ نہیں لگایا جاسکتا۔ ہزاروں جانوں کی قربانی دینے اور بے انتہا معاشی نقصانات اٹھانے کے باوجود پاکستان پر الزام تراشیوں کے جواب میں واضح کردینا چاہتے ہیں کہ بے انتہا نقصانات کے باوجود ہم بحثیت قوم ملکی، علاقائی اور عالمی امن کے لئے پرعزم ہیں۔ تعلیم ہی وہ ہتھیار ہے جس کی بدولت ہم انتہا پسندی اور دہشت گردی کو مستقل طور پرمات دے سکتے ہیں۔ہماری حکومت پر عزم ہے کہ ہم پاکستان کو ایسا معاشرہ بنائیں گے جہاں فرقہ واریت، مذہب، لسانیت، رنگ و نسل یا کسی بھی طرز پر انتہا پسندی اور تشدد کو برداشت نہیں کیا جائے گا